சட்டைகள்
----------
எத்தனை சட்டைகள்
எடுத்து அணிந்த கோலங்கள்..
வண்ணச் சட்டைகள்
வடிவான வடிவங்கள்
எண்ணப்படி எடுத்தணிந்த
எழில் மிகு தோற்றங்கள்
கொள்ளை கொள்ளையாய்
காட்சி தந்து
மனதைக்
கொள்ளை கொள்ளும் கோலங்கள்
வர்ண அழகன் அணிகின்ற
வசந்தத்தின் துணிமணிகள்
அவன்,
ஒவ்வொன்றாய் எடுத்தணிந்து
ஒய்யாரம் காட்டுகின்ற
ஒயில்தான் என்னே..
இயற்கை தோய்த்துப் போட்ட
இவ்வளவு சட்டைகளையும்,
சட்டை செய்யாத
அவனுக்குத்தான்
எத்தனை சட்டைகள்..?
0
தீரன்.
சூன்யவெளி
------------
இடமில்லா ஓரிடத்தில்
நாளில்லா ஒரு நாழிகையில்
ஆளில்லா ஒரு கூட்டத்தில்,
இன்னும்,
இருளும் ஒளியுமில்லாப் பொழுதில்
பூமியும் வானமுமில்லாதொரு
தளத்தில்,
மேலும் கீழுமில்லா
ஓரிடத்தில்,
திசைகளற்ற ஒரு திசையில்,
தொடக்கமும் முடிவுமில்லா
அந்த எல்லையில்,
நான் வருவேனோ
இறைவா,
வார்த்தையில்லாதொரு வசனத்தில்
என் காதலைச் சொல்லி அழ!
O
தீரன்..
தீரா ஆசை
சேரா இடம் சேர்வதற்குத்
தீரா ஆசை மீக்குற்றுத்
தீராவெளி தேடிச்
சிறு வெளிச்சம் கொளுத்திப்
பெரும்
சூறாவளிக்குள் பறக்கின்ற
என் மின்மினிப் பூச்சியே
ஆராவது போய்க் கண்டதுமுண்டோ
அந்த அகண்ட வெளிக்கொரு
வழியுமுண்டோ....
கோடா கோடித் திரை விலகிக்
கெண்டைக் காலின் தரிசனம்
கிடைக்கும் என்றா நீ
பறந்து செல்கின்றாய்
என் கண்மணிப் பூச்சியே...
போ.. போ,
நாட்டம் என்பது
நம் கையில் இல்லை என்பதறியாயோ
அட, என் ஆன்மிகப் பூச்சியே..
O
தீரன்
